O Faiado Podcast

A estas alturas do ano, o monte xa está cheo de croques, estalotes ou como lle chamedes na vosa zona. Iso só quere dicir unha cousa: chega San Xoán e con el o verán! Nesta estación dá tempo a que pase de todo: reencontros, amores (e desamores, claro), os mellores festivais de música, as verbenas coas anécdotas máis tolas, Compostela petada de guiris... Disto falaremos con dúas figuras clave do panorama musical galego: Grande Amore e Ortiga (aka Los Rastreadores). Soben xuntos ó Faiado para falar de aquilo que forma parte desta época estival e de como a viven eles como artistas. Xa adiantamos que non todo é alegría e diversión. Parece que o que sucede no backstage non se parece tanto ao que pasa en Las Vegas. O que si, as risas volven estar aseguradas, así que, atención, porque imos falar de cousas (o de enchernos deixámolo para outra ocasión). Non podiamos despedirnos mellor maneira!

O penúltimo episodio vén cargado de risas. E que menos, porque imos falar, precisamente, da importancia do humor nas nosas vidas e da filosofía do "nada é tan serio". Por iso, como non podía ser doutra maneira, serán os rapaces de The Rapants os que subirán ó Faiado este venres. Así que se alguén de vós ten o corasón como un after, é probable que este episodio vos axude a levalo un pouco mellor (máis que nada porque ides escachar coa risa). Tamén poderedes escoitalos falar da súa traxectoria, das súas letras e dos incribles sucesos que se dan nos seus concertos (surf por riba do público incluído). Como recibiron a noticia de que ían tocar no Son do Camiño? Que anécdotas nos poden contar do seu paso polo EmigraSON en Bruxelas? Como é que aínda non actuaron no Luar (arroba Gayoso)? Todo isto e moito máis no programa de mañá, non volo perdades!

O artivismo (arte combinada con activismo) ía ser o tema principal do noso próximo episodio. Así e todo, unha cousa acabou levando a outra. Ademais de falar da creación desta forma de loitar contra problemáticas como o machismo ou a LGBTIfobia, reflexionamos sobre máis cuestións. Por que se percibe certo cansazo xeralizado nas manifestacións do 8M? Como é levar unha conta que precisa crear contido constantemente? Gozamos dun tempo libre de calidade ou precisamos sentirnos produtivas sempre? Para falar de todo isto, subirán ó Faiado Malena, María e Uxía, tres rapazas do colectivo Guísomo Eu. Como elas mesmas o definen, trátase dun "patio de xogo e espazo de creación" que está cheo de fanzines e deseños chulísimos. Non vos perdades o que será o antepenúltimo episodio desta tempada!

No Faiado imos quentando motores para o sábado! Quen se levará o micrófono de cristal de Eurovisión? Finlandia co seu 'Cha Cha Cha? Blanca Paloma? Loreen outra vez? O eurofandom debe estar que non se ten! Desde logo, o festival deixounos grandes himnos como Waterloo, Euphoria ou Que Me Quiten Lo Bailao, claro. Pero o certo é que este certame sempre tivo moitos detractores que o critican por diversos motivos. É todo política en Eurovisión? Está visto como algo ridículo? No episodio deste venres falaremos sobre todo isto e daranos tempo a confirmar e desmontar algún que outro mito. Para iso, será Manu Maía, codirector do diario dixital Eurovision-Spain, quen subirá ao Faiado! Tamén contaremos cunha entrevista sorpresa, así que prestade moita atención :)

Nun faiado pódese atopar de todo, desde un cadro paisaxístico deteriorado ata un lote de libros coas páxinas amarelas que xa cheiran ao século II a.C. Grazas ás persoas que traballan no mundo da arte e da escritura, dentro de cincuenta anos seguiranse encontrando estas cousas nos faiados. E, por suposto, nos museos e nas librarías. Aroa Outón, artista, e Andrea Valle, poetisa, visitarán o noso podcast en representación de toda esa xente que deixará un fantástico legado para as futuras xeracións. Ademais, virán en nome das mulleres galegas que se dedican a estes eidos, así que seguro que teñen moito que dicir. Por exemplo, que Jordi Cruz (o de Art Attack, non o de Masterchef, por favor) é o único home que ten dereito a explicarlles como facer ou deixar de facer arte.

Like A Virgin de Madonna, Terra de Tanxugueiras ou, por suposto, O Galo de Pili Pampín son algunhas de tantas cancións que marcaron un antes e un despois. Que teñen todas elas en común? Pois que as súas intérpretes son artistas femininas. Todas elas teñen un talento indiscutible. Aínda así, deben facer fronte ás desigualdades de xénero presentes na industria. Por que se lles esixe máis ás mulleres que ós homes? [Insertar vídeo da transición de JLo a J Balvin na Superbowl]. Reflexionaremos sobre isto con hydn, a artista con cancións en 'galenglish' que fan que te sintas main character!

Van pasando os anos e imos estrañando cousas do noso pasado. Así e todo, a xeración Z vai máis aló: bota de menos o que viviu, mais tamén o que non. Preguntámonos en que momento desapareceu o videoclub da nosa vila ou no ben que sabían os bocadillos de chocolate que nos daban para merendar. Pero como nos gusta iso de romantizar a nosa vida ao son dun vinilo ou iso de levar un outfit que pareza sacado de calquera sitcom dos 90! Para falar sobre a nostalxia e do mercado que se fai con ela teremos con nós a artista Antía Encisa. Subirá ao Faiado para comentarnos, ademais, o seu traballo con ferramentas doutra época, como pode ser unha cámara analóxica.

"É moi probable que nalgún momento das vosas vidas desexarades vivir historias de amor dignas dunha comedia romántica. O You're so Vain de Cómo Perder a un Chico en 10 Días, o All By Myself do Diario de Bridget Jones, Love Actually, Notting Hill... Todas estas películas son ICÓNICAS. Así e todo, as romcoms teñen unha cara B: normalizan (e romantizan) comportamentos tóxicos, ademais de transmitir a imaxe dunha realidade moi pouco diversa."

Es máis de vestirte coma Mércores ou como a súa colorida amiga Enid? Es das persoas que se nega a volver á moda dos 2010?  Estas preguntas están ben para atraer a vosa atención, pero a verdade é que no Faiado, a pesar de ter opinións persoais con respecto á moda, o que nos importa é que cada un atope o seu estilo sen prexuízos. 

Así que, para falar sobre isto e máis cousas, traemos a César Rama, un artista 360 (creador de contido, fotógrafo, modelo, DJ,...) e un indiscutible amante da roupa de segunda man!

"Bad Bunny non vén ao Son do Camiño". Moita xente recibiu esta noticia coma se se tratase dunha puñalada no corazón. Pero como viviron isto dende dentro do propio festival? Que artistas podemos esperar para o cartel deste 2023? Que outros festivais de música son indispensables en Galicia?

Dende o Ortigueira ao Resurrection, pasando polo Revenidas, cada quen atopa un festi ao seu gusto. Coa cara chea de brilli brillis, ou coa roña enriba de non se lavar nunha semana, o importante é pasalo ben. E se non vén Bad Bunny? Non se acaba o mundo, que haberá máis artistas (galegos tamén).

Por fin chegou O Faiado! 🌟 Neste primeiro episodio falaremos sobre a Illa das Tentacións, Gandía Shore, Jugando con Fuego... Todos estes programas mostran realidades paralelas que poden chegar a transmitir valores cuestionables. A pesar disto e de todo o cringe que sabemos que dan algunhas actitudes, acabámonos tragando a nova tempada de calquera reality show de Netflix. Que nos pasa? A resposta é evidente: morremos polo salseo e por todos os memes que saen destes espazos televisivos (nunca olvidaremos a imaxe de Belén Esteban co seu magnífico pixama de leopardo).